వినాయక నిమజ్జనంలో అప్రమత్తంగా ఉండాలి

డీజేలకు అనుమతి లేదు.. చిన్నారులు, ఈత రాని వారిని నీటిలోకి దింపొద్దు

వాహనదారులు మద్యం సేవించి డ్రైవింగ్ చేయరాదు..

అవాంఛనీయ ఘటనలకు తావులేకుండా పోలీసులకు సహకరించాలి

వీణవంక, సెప్టెంబర్ 22, (తెలంగాణ వాణి ప్రతినిధి) : వినాయక నవరాత్రి ఉత్సవాలను భక్తిశ్రద్ధలతో నిర్వహించిన మండల ప్రజలు, ఉత్సవ కమిటీ సభ్యులకు వీణవంక పోలీస్ శాఖ శుభాకాంక్షలు తెలిపింది. వినాయక విగ్రహాల నిమజ్జనోత్సవాన్ని ప్రశాంత వాతావరణంలో, ఎటువంటి అవాంఛనీయ సంఘటనలకు తావులేకుండా విజయవంతంగా నిర్వహించేందుకు ప్రజలు, ఉత్సవ నిర్వాహకులు పోలీస్ శాఖకు పూర్తిస్థాయిలో సహకరించాలని వీణవంక సబ్‌ ఇన్‌స్పెక్టర్‌ ఆఫ్‌ పోలీస్‌ కోరారు.

నిమజ్జనోత్సవం సందర్భంగా శాంతిభద్రతల పరిరక్షణతో పాటు ప్రజల రక్షణకు అత్యంత ప్రాధాన్యత ఇస్తున్నామని పోలీసులు తెలిపారు. నిమజ్జన ఊరేగింపులు, నీటి వనరుల వద్ద ప్రజలు తప్పనిసరిగా భద్రతా నిబంధనలు పాటించాలని సూచించారు.

నిర్ణీత సమయంలోనే నిమజ్జనం

రాత్రి వేళల్లో శబ్ద కాలుష్యం తలెత్తకుండా నిమజ్జన కార్యక్రమాలను నిర్ణీత సమయం లోపలే పూర్తి చేయాలని పోలీసులు సూచించారు. ఉత్సవ కమిటీలు సమయపాలన పాటిస్తూ పోలీస్ శాఖకు సహకరించాలని కోరారు. ఊరేగింపుల సందర్భంగా ఇతరులకు ఇబ్బందులు కలగకుండా, ప్రశాంత వాతావరణంలో కార్యక్రమాన్ని నిర్వహించాల్సిన బాధ్యత నిర్వాహకులపై ఉందన్నారు.

డీజే సౌండ్‌ సిస్టమ్స్‌కు నిషేధం

వినాయక నిమజ్జన ఊరేగింపుల్లో అధిక శబ్దాలు చేసే డీజే సౌండ్‌ సిస్టమ్స్‌ వినియోగంపై నిషేధం ఉందని పోలీసులు స్పష్టం చేశారు. నిర్ణీత పరిమితులకు లోబడి మాత్రమే సాధారణ మైక్‌ సిస్టమ్స్‌ను వినియోగించాలని సూచించారు. నిబంధనలను ఉల్లంఘించి అధిక శబ్దాలతో ప్రజలకు ఇబ్బందులు కలిగిస్తే చట్టపరమైన చర్యలు తీసుకుంటామని హెచ్చరించారు.

అల్లర్లకు పాల్పడితే కఠిన చర్యలు

నిమజ్జన ఊరేగింపుల సమయంలో ఎవరైనా శాంతిభద్రతలకు విఘాతం కలిగించేలా వ్యవహరించినా, గొడవలకు లేదా అల్లర్లకు పాల్పడినా ఉపేక్షించేది లేదని పోలీసులు తెలిపారు. ఉత్సవాల పేరుతో చట్టాన్ని చేతుల్లోకి తీసుకోవడం, ఇతరులను రెచ్చగొట్టడం, ప్రజలకు ఇబ్బందులు కలిగించడం వంటి చర్యలకు పాల్పడితే సంబంధిత వ్యక్తులపై చట్టపరమైన చర్యలు తీసుకుంటామని స్పష్టం చేశారు.

చెరువులు, కాలువల వద్ద అప్రమత్తత అవసరం

వినాయక విగ్రహాల నిమజ్జనం నిర్వహించే చెరువులు, కాలువలు, ఇతర నీటి వనరుల వద్ద ప్రజలు అత్యంత జాగ్రత్తగా ఉండాలని పోలీసులు సూచించారు. ముఖ్యంగా చిన్న పిల్లలు, ఈత రాని వ్యక్తులను ఎట్టి పరిస్థితుల్లోనూ నీటిలోకి దిగనివ్వకూడదన్నారు. ఉత్సవ నిర్వాహకులు నిమజ్జనం కోసం అనుభవజ్ఞులైన వ్యక్తులను మాత్రమే నీటిలోకి పంపించాలని సూచించారు. ప్రమాదాలు జరగకుండా ముందస్తు జాగ్రత్తలు తీసుకోవాలని కోరారు.

వాహనాల్లో పరిమితికి మించి జనాన్ని ఎక్కించొద్దు

విగ్రహాలను తరలించే వాహనాల్లో పరిమితికి మించి ప్రజలను ఎక్కించరాదని పోలీసులు స్పష్టం చేశారు. వాహన చోదకులు మద్యం సేవించి వాహనాలు నడపకూడదని, నెమ్మదిగా మరియు అప్రమత్తంగా వాహనాలను నడపాలని సూచించారు. ఊరేగింపు సమయంలో వాహనాలపై నిలబడి ప్రయాణించడం, ప్రమాదకరంగా వ్యవహరించడం వంటి చర్యలకు దూరంగా ఉండాలని తెలిపారు.

విద్యుత్ తీగల విషయంలో ప్రత్యేక జాగ్రత్తలు

నిమజ్జన ఊరేగింపు మార్గాల్లో విద్యుత్ తీగలు ఉండే అవకాశం ఉన్నందున పెద్ద విగ్రహాలను తరలించే సమయంలో ప్రత్యేక జాగ్రత్తలు తీసుకోవాలని పోలీసులు సూచించారు. విగ్రహాలను తీసుకెళ్లే వాహనానికి ఇరువైపులా ఉత్సవ కమిటీకి చెందిన ఒకరిద్దరు వ్యక్తులు రక్షణగా ఉండి, విద్యుత్ తీగలు, ఇతర అడ్డంకులను గమనిస్తూ వాహనాన్ని ముందుకు తీసుకెళ్లేలా చూడాలని సూచించారు.

పోలీసులకు సహకరించాలి

వీణవంక మండలంలో వినాయక నిమజ్జనోత్సవాలను ప్రశాంతంగా, సురక్షితంగా, ఆనందోత్సాహాల మధ్య నిర్వహించేందుకు ప్రజలందరూ పోలీస్ శాఖకు సహకరించాలని ఎస్‌ఐ కోరారు. ఉత్సవ కమిటీలు పోలీసుల సూచనలను పాటిస్తూ నిమజ్జన కార్యక్రమాలను నిర్వహించాలని తెలిపారు.

ప్రజల భద్రతే ప్రధాన లక్ష్యంగా పోలీస్ శాఖ పనిచేస్తోందని, ఎక్కడైనా అత్యవసర పరిస్థితి ఏర్పడినా, అనుమానాస్పద పరిస్థితులు కనిపించినా లేదా పోలీసుల సహాయం అవసరమైనా వెంటనే 112కు సమాచారం అందించాలని సూచించారు. అవసరమైతే స్థానిక వీణవంక పోలీస్ స్టేషన్‌ను సంప్రదించాలని కోరారు.

వినాయక నిమజ్జనం సందర్భంగా ప్రతి ఒక్కరూ బాధ్యతాయుతంగా వ్యవహరించి, ఇతరులకు ఇబ్బందులు కలగకుండా ఉత్సవాలను సురక్షితంగా ముగించాలని వీణవంక పోలీస్ శాఖ విజ్ఞప్తి చేసింది.