హైదరాబాద్ పోలీస్ కమిషనర్‌గా మహేశ్ భగవత్
21 మంది సీనియర్ అధికారులకు కొత్త బాధ్యతలు.. కీలక విభాగాల్లో ప్రక్షాళన
సజ్జనార్‌కు అగ్నిమాపక శాఖ బాధ్యతలు.. సౌమ్య మిశ్రాకు మహిళా భద్రత.. స్వాతి లక్రాకు జైళ్ల శాఖ
హైదరాబాద్, నవంబర్ 12 (తెలంగాణ వాణి) తెలంగాణ రాష్ట్ర పోలీస్ శాఖలో ప్రభుత్వం భారీ స్థాయిలో ప్రక్షాళన చేపట్టింది. పోలీస్ యంత్రాంగంలో కీలక మార్పులు చేస్తూ గురువారం 21 మంది ఐపీఎస్ అధికారులను బదిలీ చేస్తూ, వివిధ కీలక పదవుల్లో నియమిస్తూ ఉత్తర్వులు జారీ చేసింది. హైదరాబాద్ పోలీస్ కమిషనర్‌గా సీనియర్ ఐపీఎస్ అధికారి మహేశ్ మురళీధర్ భగవత్ నియమితులయ్యారు. ఇప్పటివరకు హైదరాబాద్ పోలీస్ కమిషనర్‌గా పనిచేసిన వీసీ సజ్జనార్‌కు అగ్నిమాపక, విపత్తు ప్రతిస్పందన, అత్యవసర సేవలు, పౌర రక్షణ శాఖ డీజీ బాధ్యతలు అప్పగించారు. ఈ బదిలీలతో రాష్ట్ర పోలీస్ శాఖలో కీలక విభాగాల అధిపతుల స్థానాల్లో మార్పులు చోటుచేసుకున్నాయి.
హైదరాబాద్ పోలీస్ కమిషనర్‌గా మహేశ్ భగవత్
1995 బ్యాచ్‌కు చెందిన ఐపీఎస్ అధికారి మహేశ్ మురళీధర్ భగవత్ ప్రస్తుతం డీజీపీ (లా అండ్ ఆర్డర్)గా విధులు నిర్వహిస్తున్నారు. ఆయనను హైదరాబాద్ నగర పోలీస్ కమిషనర్‌గా ప్రభుత్వం నియమించింది. ఇప్పటివరకు ఈ బాధ్యతలు నిర్వహించిన వీసీ సజ్జనార్‌ను అగ్నిమాపక, విపత్తు ప్రతిస్పందన, అత్యవసర సేవలు, పౌర రక్షణ శాఖ డైరెక్టర్ జనరల్‌గా బదిలీ చేసింది. తదుపరి ఉత్తర్వులు వెలువడే వరకు ప్రత్యేక రక్షణ దళం (ఎస్‌పీఎఫ్) డీజీగా అదనపు బాధ్యతలు కూడా నిర్వహించనున్నారు.
సౌమ్య మిశ్రా, స్వాతి లక్రాలకు కీలక బాధ్యతలు
జైళ్లు, దిద్దుబాటు సేవల డీజీగా పనిచేస్తున్న డాక్టర్ సౌమ్య మిశ్రాను డీజీపీ (మహిళలు, భద్రత), షీ టీమ్స్, భరోసా విభాగాలకు బదిలీ చేశారు. ఆమెకు డీజీపీ (ఆర్గనైజేషన్), డీజీపీ (లీగల్) బాధ్యతలు కూడా అప్పగించారు. మరోవైపు డీజీపీ (ఆర్గనైజేషన్ అండ్ హోంగార్డ్స్)గా పనిచేస్తున్న స్వాతి లక్రాను జైళ్లు, దిద్దుబాటు సేవల డైరెక్టర్ జనరల్‌గా నియమించారు. హోంగార్డ్స్ డీజీగా అదనపు బాధ్యతలు కూడా నిర్వహించనున్నారు.
చారు సిన్హాకు ఏసీబీ పగ్గాలు
సీఐడీ డీజీపీగా పనిచేస్తున్న చారు సిన్హాను అవినీతి నిరోధక శాఖ (ఏసీబీ) డైరెక్టర్ జనరల్‌గా నియమించారు. ఆమె సీఐడీ డీజీపీగా అదనపు బాధ్యతలు కొనసాగిస్తారు. పోస్టింగ్ కోసం ఎదురుచూస్తున్న 2001 బ్యాచ్ ఐపీఎస్ అధికారి అకున్ సబర్వాల్‌కు అదనపు డీజీపీ (శాంతిభద్రతలు) బాధ్యతలు అప్పగించారు. ఏడీజీపీ (సమన్వయం), ఏడీజీపీ (సాంకేతిక సేవలు/టి-స్పార్క్) బాధ్యతలు కూడా నిర్వహించనున్నారు.
టీజీఎస్‌ఆర్టీసీ ఎండీగా అనిల్ కుమార్
గ్రేహౌండ్స్, ఆక్టోపస్ విభాగాల డీజీపీ (ఆపరేషన్స్)గా పనిచేస్తున్న డాక్టర్ అనిల్ కుమార్‌ను తెలంగాణ రాష్ట్ర రోడ్డు రవాణా సంస్థ (టీజీఎస్‌ఆర్టీసీ) వైస్ చైర్మన్, మేనేజింగ్ డైరెక్టర్‌గా బదిలీ చేశారు. ఆయన స్థానంలో విక్రమ్ సింగ్ మాన్‌ను నియమించారు. పోలీస్ హౌసింగ్ కార్పొరేషన్ డీజీగా కూడా అదనపు బాధ్యతలు అప్పగించారు.
నాగిరెడ్డికి పౌరసరఫరాల శాఖ
1997 బ్యాచ్ ఐపీఎస్ అధికారి వై. నాగిరెడ్డిని పౌరసరఫరాల శాఖ కమిషనర్‌గా, వినియోగదారుల వ్యవహారాల శాఖ ఎక్స్‌అఫీషియో ప్రిన్సిపల్ సెక్రటరీగా నియమించారు. పౌరసరఫరాల కార్పొరేషన్ వైస్ చైర్మన్, మేనేజింగ్ డైరెక్టర్‌తో పాటు లీగల్ మెట్రాలజీ కంట్రోలర్ బాధ్యతలు కూడా అప్పగించారు. 1999 బ్యాచ్ అధికారి ఎం. స్టీఫెన్ రవీంద్రను తెలంగాణ ట్రాఫిక్ మేనేజ్‌మెంట్, రోడ్డు, రైలు భద్రతా బ్యూరో డైరెక్టర్‌గా నియమించారు.
ఏసీబీ, నిఘా విభాగాల్లో మార్పులు
మల్టీ జోన్-1 నుంచి బదిలీ అయిన ఎస్. చంద్రశేఖర్ రెడ్డికి ఏసీబీ డైరెక్టర్‌గా బాధ్యతలు అప్పగించారు. దీంతో ఏసీబీ అదనపు బాధ్యతల నుంచి అవినాష్ మొహంతికి విముక్తి కల్పించారు. ఇంటెలిజెన్స్ ఐజీగా పనిచేస్తున్న కార్తికేయను మల్టీ జోన్-1 ఐజీగా నియమించారు. ఇంటిగ్రేటెడ్ కమాండ్ అండ్ కంట్రోల్ సెంటర్ డైరెక్టర్‌గా అదనపు బాధ్యతలు కూడా అప్పగించారు. రైల్వేలు, రోడ్డు భద్రత విభాగం ఐజీగా ఉన్న కె. రమేష్ నాయుడును రైల్వే ఐజీగా నియమించారు. హైదరాబాద్ ట్రాఫిక్ జాయింట్ కమిషనర్ డి. జోయెల్ డేవిస్‌ను తెలంగాణ ట్రాఫిక్ మేనేజ్‌మెంట్, రోడ్డు భద్రతా విభాగంలో జాయింట్ డైరెక్టర్‌గా బదిలీ చేశారు. హైదరాబాద్ ట్రాఫిక్ జాయింట్ కమిషనర్‌గా అదనపు బాధ్యతలు కొనసాగించనున్నారు. ఏడీజీపీ సంజయ్ కుమార్ జైన్‌కు ఏడీజీపీ (శిక్షణ) అదనపు బాధ్యతలు అప్పగించారు.
జోన్ల వారీగా అదనపు బాధ్యతలు
ఫ్యూచర్ సిటీ కమిషనరేట్ జాయింట్ కమిషనర్ జి. చందన దీప్తికి జోగులాంబ జోన్-7 డీఐజీగా అదనపు బాధ్యతలు అప్పగించారు. ఇంటెలిజెన్స్ సీఐ సెల్ డీఐజీ ఆర్. భాస్కరన్‌కు ఇంటెలిజెన్స్ డీఐజీ బాధ్యతలు ఇచ్చారు. రాష్ట్ర క్రైమ్ రికార్డ్స్ బ్యూరో, సీఐడీ డీఐజీ కె. నారాయణ నాయక్‌కు బసర జోన్-2 డీఐజీగా అదనపు బాధ్యతలు కేటాయించారు. ఎల్.ఎస్. చౌహాన్‌ను డీఐజీ (సమన్వయం)గా నియమించడంతో పాటు చార్మినార్ జోన్-6 డీఐజీ బాధ్యతలు అప్పగించారు. పోస్టింగ్ కోసం ఎదురుచూస్తున్న శ్రీ బాల దేవిని తెలంగాణ ట్రాఫిక్ మేనేజ్‌మెంట్, రోడ్డు భద్రతా విభాగంలో డిప్యూటీ డైరెక్టర్ (పరిపాలన)గా నియమించారు. వి. ఆరవింద బాబును హైదరాబాద్ నగర ఎస్ఎం అండ్ ఐటీ విభాగం డీసీపీగా నియమించారు.
పోలీస్ శాఖలో కొత్త సమీకరణాలు
ఒకేసారి 21 మంది ఐపీఎస్ అధికారులకు స్థానచలనం కల్పించడం రాష్ట్ర పోలీస్ శాఖలో ప్రాధాన్యత సంతరించుకుంది. నగర పోలీస్ కమిషనరేట్, శాంతిభద్రతలు, మహిళా భద్రత, ఏసీబీ, సీఐడీ, జైళ్లు, రవాణా, నిఘా, ట్రాఫిక్ విభాగాల్లో కీలక మార్పులు చోటుచేసుకున్నాయి. ఈ మార్పులు ఆయా విభాగాల పనితీరుపై ఎలాంటి ప్రభావం చూపుతాయి? నేర నియంత్రణ, అవినీతి నిరోధం, ప్రజలకు మెరుగైన పోలీస్ సేవల అందింపులో కొత్త అధికారులు ఎలాంటి మార్పులు తీసుకొస్తారన్నది ఆసక్తికరంగా మారింది.
