వేములవాడ,అక్టోబర్ 09 (తెలంగాణ వాణి ప్రతినిధి):తెలంగాణ సంస్కృతి, సంప్రదాయాలకు ప్రతీకగా నిలిచే బతుకమ్మ పండుగను మహిళా సోదరీమణులందరూ సంతోషంగా, ఐకమత్యంతో, ప్రశాంత వాతావరణంలో ఘనంగా జరుపుకోవాలని మాజీ సర్పంచ్, ధర్మకర్త, సెస్ డైరెక్టర్ పొలాస నరేందర్ ఆకాంక్షించారు. ఏడు రోజుల బతుకమ్మ వేడుకల ప్రారంభం సందర్భంగా మహిళలందరికీ ఆయన హృదయపూర్వక శుభాకాంక్షలు తెలిపారు.తెలంగాణ రాష్ట్ర సంస్కృతి, సంప్రదాయాలకు బతుకమ్మ పండుగ ప్రత్యేక గుర్తింపు తెచ్చిందని నరేందర్ పేర్కొన్నారు. మహిళలకు అత్యంత ప్రీతిపాత్రమైన ఈ పండుగను ఏడు రోజులపాటు ప్రతిరోజూ పర్వదినంగా భావించి భక్తిశ్రద్ధలతో జరుపుకుంటారని తెలిపారు. ప్రకృతిలో లభించే వివిధ రకాల రంగురంగుల పూలతో బతుకమ్మలను అందంగా పేర్చి, అలంకరించి పూజించడం ఈ పండుగ ప్రత్యేకత అని అన్నారు.కులమతాలకు అతీతంగా మహిళలందరూ ఒకచోట చేరి బతుకమ్మల చుట్టూ తిరుగుతూ సంప్రదాయ పాటలు పాడుతూ, కోలాటాలతో సంబరాలు చేసుకోవడం తెలంగాణ సంస్కృతిలో విశిష్టమైన భాగమని పేర్కొన్నారు. మహిళల మధ్య ఐకమత్యం,ఆనందాన్ని పెంపొందించే ఈ పండుగను ప్రతి ఒక్కరూ ఉత్సాహంగా జరుపుకోవాలని పిలుపునిచ్చారు.బతుకమ్మ పండుగలో భాగంగా తొలిరోజు నిర్వహించే ఎంగిలిపూల బతుకమ్మ నుంచి చివరి రోజు సద్దుల బతుకమ్మ వరకు వేడుకలు విజయవంతంగా సాగాలని ఆకాంక్షించారు. మహిళా సోదరీమణులందరూ సుఖసంతోషాలతో, ఆయురారోగ్యాలతో ఉండాలని, బతుకమ్మ సంబరాలు అంగరంగ వైభవంగా జరగాలని పొలాస నరేందర్ కోరుకున్నారు.
